Hajjin Bana: Ba Ma Hada Maza da Mata a Masauki — Gwamnatin Kaduna

Rahoton, wanda jaridar Hajj Reporters ta wallafa, ya yi zargin cewa wasu daga cikin alhazan jihar mata da maza na kwana a wuri daya a Saudiyya.

Sai dai, a wani jawabi da hukumar kula da jin daɗin alhazai ta jihar Kaduna (KSPWA) ta fitar a ranar Lahadi, ta ce wannan zargi ba shi da tushe balle makama.

Hukumar ta bayyana cewa tun asalinsu ba su saba hada maza da mata a masaukai ba, kuma lamarin ya ba su mamaki ganin yadda rahoton ya bayyana hakan ba tare da bincike ba.

A cewar jawabin:

“Muna da kwararrun jami’an yada labarai da masu magana da yawun hukumar. Amma, abin mamaki, jaridar ba ta tuntubi kowa daga cikin mu ba kafin wallafa rahoton.”

Hukumar ta kara da cewa tana mutunta doka da tsarin addini, kuma ba za ta taba aikata abin da ya saba da ka’ida ko addini ba.