Gwamnati Tayi Gargadin Daukar Kwakwkwaran Mataki Ga Duk Ma’aikacin Da Ya fallasa Takardun Sirrinta

Gwamnatin Tarayya ta yi barazanar fara korar duk jami’in da ta samu da hannu a fallasa takardun sirrin gwamnati ta kafafen sada zumunta na zamani.

Shugabar Ma’aikata ta Kasa, Dokta Folasade Yemi-Esan ce ta yi gargadin a wata wasika da ta fitar mai dauke da kwanan watan biyu ga Agustan 2021.

Wasikar, mai taken ‘Fallasa sirrin gwamnati ta kafafen sada zumunta ba bisa ka’ida ba’ na dauke da lambar HCSF/3065/Vol.1 /94.

Karo na biyu kenan da gwamnatin ke bayar da irin wannan gargadin a cikin shekara daya.

A cewar wasikar, “Wannan ba dabi’ar da za mu lamunta ba ce ta fallasa wasikun gwamnati, kwafin dokoki, takardun taruka ko kowanne irin sirri na gwamnati ta kafafen sada zumunta.

“Hakan ba karamin sakaci ba ne da kuma saba wa rantsuwar da ma’aikata suka yi lokacin daukarsu aiki, wanda kuma zai iya kai wa ga kora daga aiki, kamar yadda dokokin aikin gwamnati suka tanada.

“Saboda haka, Manyan Sakatarori da shugabannin hukumomi su yi kokarin yada wannan wasika ga dukkan ma’aikata don su san da ita,” inji sanarwar.

Ko a watan Maris sai da gwamnatin ta fitar da makamanciyar irin wannan sanarwar tare da barazanar daukar kwakkwaran mataki kan duk wanda ya yi kunnen uwar shegu da ita

DAILY EPISODE HAUSA

KU BIYO MU A FACEBOOK DA TWITTER